Io sono tunisino

الشاب الي لا خدمة لا قدمة يحرق

الطالب الي يمشي يكمّل في قرايتو يحرق

التلميذ الي يمشي في سفر منظّم يحرق

الكهل الي يصلّي و يخاف ربي يمشي يحج يحرق

العزوزة الي تمشي للعمرة تحرق

المعارض الي تضياق بيه الدنيا يحرق

المناضل الي عجبتو القعدة قال خليني نحرق

الباش مهندس الي عندو سنيين يستنّي فالموافقة علي مشروعو من غير امل يحرق

الحارق الي شبع حبس يخرج و يعاود يحرق

الي بنت حومتها ما تعرفش تكتب اسمها علقلة

تروّح كل عام من عند الطليان بكرهبة جديدة تحرق

الي خوه و ولد عمّو و ولد حومتو تقصف شبابهم في حرقة يحرق

الحبلة الي ما تعرفش من شكون تحط يدها علي كرشها و تحرق

و الي منع باعجوبة من موت محقّقة غدو يطلع الصباح و يعاود يحرق

.....

الي في دارو داير بمرتو و صغارو و شيطانو يقلو

و انت سي الشباب وقتاش ناوي تحرق

و الي بفلوسو و ممتلكاتو و الفيزة ولاّت عقدتو

يقول نخلي الي قدامي و الي ورايا و نحرق

و الي من الحانة للحانة يغرّق في همومو و لسان حالو يقول

غدو نحرق