BELDI VS. GO3R

ما كنتش نضن و أنو باش يجي نهار باش نحكي علي موضوع كيما هذا. كنت نتصور و أنو الكليشيات من نوع بلدي و أفقي و ولد المدينة و القعر، بوضع ثلاثة نقط علي القاف، هي مهاترات قديمة و تجاوزتها الأحداث. لكن ضهر بالمكشوف و انو الحماقة ما زالت ضاربة اطنابها في هالبلاد و هذا شيئ ما هوش غريب إذا اقرينا بالإنحطاط و تدني المستويات إلي ولات القاسم المشترك للثقافة المتداولة في هالبلاد.

في إحد المدونات الإخيرة متاع بيغ تراب بوي فما معلق جاهل اكثر من إلي هو مجهول تصور روحو و انو عندو باع و ذراع في موضوع التبلد و التمدن و انو ثقافتو البدائية تسمحلو باش يتفقه في مواضيع هو بعيد عليها بعد السماء عل الوطي. هال الغبي إلي ظهر و أنو مطبق من النوع الركيك خيلتلو اوهامو و أنو البلديّة ، بوضع سكون علي اللام، هما سكان تونس الحاضرة. حسب مفهومو البلدي هو الإنسان الي تنطبق عليه المعايير التالية : انو يكون من سكان تونس العاصمة، انو يكون يتكلم بالقاف و انو يكون يعرف يلبس ؟؟؟

تعريفتو للبلدية الخاصة جدا طعتينا ديجا فكرة واضحة علي الثقافة الموسوعية إلي يتمتع بيها هالجدور و من جهة أخري العبارات المرزيّة الي استعملها في تعاليقو هي بدورها دليل علي تمكنو من اخلاق و شيم البلدية الي هوما من طينتو.

لها سي الشباب نحب نفسرلو بعض المفاهيم إلي ربما تخلطت في ذهنو. تونس العاصمة هي اولا عاصمة بقرار سياسي بحت و عمرها ما كانت العاصمة الابدية متاع البلاد. قبلها هي كانت القيروان و المهدية عواصم زاد. و إذا كان الوضعية بقات علي هاك الحال راهم سكان تونس ألي كيفك اليوم كانو يرقاو ارواحهم مندرجين في خانة النزوح. و من جهة أخري يكون في علمك ألي من أكبر العايلات البلديّة العريقة الي تعرفت بالجاه و النسب والي تسكن العاصمة من سنين الله هي في الحقيقة أصيلة مدن كيما صفاقس، المهدية و القيروان و منستير... أمثال، علي سبيل الذكر و لا الحسر، الملولي، الجلولي، المستيري، صفر،... و نزيدك أكثر من هذا عايلات أخري الي هي زاد تعتبر من قع الخابية و جمعت العلم و الحكمة (الرياحي، بن ضياف، بوحاجب...) تنحدر في أصلها من قري صغيرة أمثال تستور، بمبلة، بوعرادة...

و هكا البلديّة ما يكونوش حكر علي تونس الحاضرة أكهو لأنو المدن الاخري كيف بنزرت، و الكاف و باجة، و قفصة و نابل و قابس و توزر... و قري كيف العالية و طبربة و تكرونة و البقالطة و الحامة و ميدون ... و حتّي الدوّار و القصور هي زاد عندها بلديّاتها و أعيانها. و البلديّة متاع هل الأماكن هذي، بغض الطرف عن أهميتها و موقعها الجغرافي، ما يفتخروش بالقشور و الشعارات الزايفة و إنما يفتخرو بعاداتهم و تقاليدهم و إنتماءهم للارض أجدادهم الي يسكنوا فيها منذ عدة أجيال.

قبل ما نغلق الموضوع نحب نوجه رسالة شخصية للمغط الي ري في ردي علي كلامو المرزي و اني مجراب و همزتني مرافقي نقولو الي أنا من سكان الضاحية الشمالية منذ أربعة اجيال و الي عائلة أمي تملك تربتها الخاصة في الجلاز راقدين فيها أجدادي منذ خمسة اجيال نسميهم واحد واحد بنساهم و رجالهم و الي أجدادي من عائلة بابا مدفونين في سيدي عبد العزيز و باالرغم من هذا الكل عمري ما نكرت لا أصلي و لا إنتمائي لولاية من الجنوب و من الساحل و عمري ما تبهرت بأصولي لا التركية و لا المغربية و لا حتي الأندلسية يكفيني شرف و أني نحس روحي تونسي و أني نعرف من أنا سجرة جاء العرف.